राज्यातील हवामानात पुन्हा एकदा लक्षणीय बदल होताना दिसत आहे

Tiranga Times Maharashtra

राज्यातील हवामानात पुन्हा एकदा लक्षणीय बदल होताना दिसत आहे. गेल्या काही दिवसांपासून कधी पाऊस तर कधी थंडी अशी मिश्र परिस्थिती अनुभवायला मिळत आहे. भारतीय हवामान विभागाने दिलेल्या अंदाजानुसार 16, 17 आणि 18 जानेवारीदरम्यान राज्यातील हवामानात चढ-उतार राहणार आहेत. काही भागांत पहाटे व रात्री थंडी वाढण्याची शक्यता असून दुपारच्या वेळी ढगाळ वातावरण दिसू शकते.

नवीन वर्षाच्या सुरुवातीलाच अनेक जिल्ह्यांमध्ये अवकाळी पावसाने हजेरी लावली होती. त्यानंतर थंडी कमी होत असल्याचं चित्र असतानाच पुन्हा गारठा वाढण्याची चिन्हं आहेत. या बदलत्या हवामानाचा थेट परिणाम नागरिकांच्या आरोग्यावर होत असून सर्दी, खोकला, ताप यांसारख्या तक्रारी वाढताना दिसत आहेत.

मुंबई आणि उपनगरात वायू प्रदूषणाचं प्रमाणही वाढलं आहे. त्यामुळे श्वास घेणं अवघड होत असून प्रशासनाकडून मास्क वापरण्याच्या सूचना दिल्या जात आहेत. उत्तरेकडील राज्यांमध्ये कडाक्याची थंडी पडत असल्याचा परिणाम महाराष्ट्रावरही होऊ शकतो, असा अंदाज हवामान विभागाने वर्तवला आहे. त्यामुळे पुढील काही दिवस नागरिकांनी हवामानाचा अंदाज लक्षात घेऊन काळजी घेण्याचं आवाहन करण्यात आलं आहे.

maharashtra-weather-update-january-16-17-18-imd-forecast