Tiranga Times Maharashtra
वुमन्स प्रीमियर लीग 2026 मध्ये यूपी वॉरियर्सने अखेर पहिल्या विजयाची नोंद करत स्पर्धेत जोरदार पुनरागमन केलं आहे. आठव्या सामन्यात यूपी वॉरियर्सने बलाढ्य मुंबई इंडियन्सला 7 गडी राखून पराभूत करत सर्वांनाच धक्का दिला. सलग तीन पराभवानंतर मिळालेला हा विजय यूपी वॉरियर्ससाठी आत्मविश्वास वाढवणारा ठरला आहे.
सामन्यात नाणेफेक जिंकून यूपी वॉरियर्सने प्रथम गोलंदाजी करण्याचा निर्णय घेतला. मुंबई इंडियन्सची सुरुवात मात्र संथ झाली. पॉवरप्लेमध्ये संघाला केवळ 32 धावा करता आल्या. पहिली विकेट 43 धावांवर पडली. अमनजोत कौरने 33 चेंडूत 38 धावांची झुंजार खेळी केली, मात्र इतर फलंदाज अपेक्षेप्रमाणे कामगिरी करू शकले नाहीत. गुणालन कमालिनी लवकर बाद झाली, तर कर्णधार हरमनप्रीत कौरही मोठी खेळी उभारण्यात अपयशी ठरली.
मुंबईकडून नॅट स्कायव्हर ब्रंटने जबाबदारीने फलंदाजी करत 43 चेंडूत 65 धावा केल्या. तिच्या खेळीमुळे मुंबई इंडियन्सला 20 षटकांत 5 गडी गमावून 161 धावा करता आल्या. निकोला कॅरेनेही 20 चेंडूत नाबाद 32 धावा जोडत संघाचा स्कोअर सन्मानजनक पातळीवर नेला.
162 धावांच्या आव्हानाचा पाठलाग करताना यूपी वॉरियर्सच्या फलंदाजांनी आत्मविश्वासाने खेळ केला. सुरुवातीपासूनच त्यांनी धावगती नियंत्रणात ठेवत मुंबईच्या गोलंदाजांवर दबाव टाकला. केवळ 18.1 षटकांत 3 गडी गमावून यूपी वॉरियर्सने लक्ष्य पूर्ण केलं आणि स्पर्धेतील पहिला विजय साकार केला.
या विजयामुळे यूपी वॉरियर्सच्या मोहिमेला नवी दिशा मिळाली असून मुंबई इंडियन्सला मात्र आपल्या कामगिरीचा पुन्हा आढावा घ्यावा लागणार आहे.
.png){kind=spacer}
